اسماعیل كنعانی‌نین شهــــــرداری شــــــعــری

 شَهریمیز كنده دؤنور، یوخلاما گوگانلی اُویان

گؤزونو آچ، بو یازیخ حالینی فَهم اِیله بیرآز

اَل بیر اُول، بیر سَس اُولاق، بو سُؤزه سَس وئر اوجادان

شهردار رَحم اِله بو میلّته سَن قُوشما جاهاز

اینصاف ایله، شهرداری بیزه رحم ایله بیرآز

 

آخی میلّت‌ده نَه وار، مین یولونان پول آلیسان!

جَرمَه‌نی، مادّه‌صدی بیر- بیری اوسته قالیسان

بیزده قان قالمادی كی، گاه سُوروسان، گاه یالیسان

بو یازیخ میلّته آددیم باشینا آز قویو قاز

اینصاف ایله، شهرداری بیزه رحم ایله بیرآز

 

گوگانین باغلاری سُولدو، سولاری شورلاشدی

نوزولا دُولدو جماعت، بَركت‌ده قاشدی

یوخسولون سیندی بئلی، ظلم‌كی حَددن آشدی

باقری سَن‌ده داها رُوضه اُخویوب قیلما ناماز

اینصاف ایله، شهرداری بیزه رحم ایله بیرآز

 

گؤر توفارقانلی نِئجه باغلادی گوگان یولونو!

بیری‌نین چیخدی سَسی، چیرمالادی اَل- قولونو

ایتیریب میلّتیمیز اَل- آیاقین، ساغ سولونو

حاققینی ایستمه‌یه قورخور اولان، ایلیری ناز

اینصاف ایله، شهرداری بیزه رحم ایله بیرآز

 

نَه اُولوب گوگانا، هاممی قاچیری، شهرین آتیر

آخی كتلرده بَیه‌نمیر بیزی، دُوستلوقدان آتیر

هامیسی بیر یان، آخی‌جان‌دا بیزه بیرنیز آتیر

نیسگیلی چوخدو بو شهرین، صمدین بُوغدو آراز

اینصاف ایله، شهرداری بیزه رحم ایله بیرآز

 

بیری ایستیر سُونا قویسون، تِئز اُونا داش سالینیر

زلفعلی دام سوواجاق، فوری عَواریض آلینیر

میلّتین وار- یُوخو باخ گؤر نئجه سَس‌سیز چالینیر

اخطار آز یُوللا سن‌الله، باشیمی اِیله‌مَه داز

اینصاف ایله، شهرداری بیزه رحم ایله بیرآز

 

كوچه وور هریانا، ها آدلارینی قُوی خیاوان

بَزه‌یی‌نَن قوجا آرواد اُولا بیلمز قیلمان

بورا لازیمدی هنرمند اِئوی، بیماریستان

دَه‌وَه‌نی كمچه ملاغه ایله سووارماق اولماز

اینصاف ایله، شهرداری بیزه رحم ایله بیرآز

 

هَر كسی توتسا، اُؤتورمز بالاجا بالایی

هاوادا ساخلیاجاق، وِئرمَه‌یَه‌جَك امضایی

ریزه- میزه، مازیراخ، اُو بالاجا بالایی

یاپیشیبدیر گنه تك میلّته، هئچ گئچمیری واز

اینصاف ایله، شهرداری بیزه رحم ایله بیرآز

 

شورالار رأیی آلیبلار، هَله بیر سَس یُوخدو

تاپسالار اُؤزلرینی، گؤرمَه‌یَه ایشلر چُوخدو

آللاها مین شوكور اُولسون كی، قارینلار تُوخدو

هَه‌ره بیر مَسجیده اَیلَشدی، ائدیر راز و نیاز

اینصاف ایله، شهرداری بیزه رحم ایله بیرآز

 

 

شهردار وقت اُولا بیر گون گله‌سن كوچه‌میزه

باتاسان پالچیغا، هئچ چیخمیاسان بیرده اوزه

بلكه رَحمین گله آسفالت وِئرسن كوچه‌میزه

چیرمالان، سَنده بو حاقدا بیزه گؤستر اِعجاز

اینصاف ایله، شهرداری بیزه رحم ایله بیرآز

 

 

گِئجه گوندوز دییریك كاش قالاسان سَن ویرانا

داها یالوارمیاق او صابیره، ساغَرچیانا

چَكر آلله سیزی بیر گون حسابا، هم دیوانا

فاش اولار عالمه بو قودوغونوز حلقه‌ی راز

اینصاف ایله، شهرداری بیزه رحم ایله بیرآز

 

شاعیر آز وور گئجه‌لر ایستیكانی ایستیكانا

سانما میلّت دوشونه حالینی، بیر ذرّه یانا

اَلینی قووزا گویه، بلكه قیامت‌ده قانا

یارانی دوزلاما قارداش یانیرام، نسخه‌نی یاز

اینصاف ایله، شهرداری بیزه رحم ایله بیرآز