گئجه لر
دوت الیمدن بو همان الدی فراقیندا سنی
یادیما سالماق همان باشا چالاردیم گئجه لر
حوسنو روخسارینی رؤیاده چكردیم قلمه
قلبیمی قاب ائلییب قابا سالاردیم گئجه لر
بونا خاطیر كی آدین دوشمه یه اغیار الینه
دوز كیمی آدیوی یازدیقجا یالاردیم گئجه لر
بئله سیزلاردی اورك یادینا سالدیقجا سنی
قوش كیمی یئرده دوشردیم چاپالاردیم گئجه لر
بلكه سن ساغ یاشاییب ، ساغ دولانیب ، ساغ گزه سن
گؤزلیم هر قادان اولسایدی آلاردیم گئجه لر
سن رقیبیمله گونوز سیره چیخاردین چمنه
من ده عشقینده سولاردیم سارالاردیم گئجه لر
گؤزلرین یادیما دوشدوكجه اسردی بدنیم
سینه می دیرناق آتاردیم پارالاردیم گئجه لر
تابلو اوستونده چكردیم سنی مین زحمتی لن
بیر باخیب اوستونه تئز رنگی جالاردیم گئجه لر
ایندی ده گئتمه لی سن گئت دئمیرم من ده گلیم
قاللام اول حالدا كی اوّلده قالاردیم گئجه لر
مكتب عشقیده مجنونیله من با هم ایدیك
غم ییغاردیم سینه مه غم قالایاردیم گئجه لر
مجنون اؤز عشقینی لیلایه گؤره بیلدیردی
من گونوز یازدیقیم عشقی قارالاردیم گئجه لر
استاد هوشنگ جعفری