آنام آذربایجان باشین ساغ اولسون
قارا بایراقلاری آسین هر یئره
آنام آذربایجان باشین ساغ اولسون
چولغانیب کفنه اورمو گؤلوموز
دومانلی ساوالان باشین ساغ اولسون
گنجه باغرینا باس باجین سولدوزو
سووورون باشلارا توز تورپاغ، دوزو
چاغیرین یاردیما آیی اولدوزو
یارالی ورزیقان باشین ساغ اولسون
تاتائو! جیغاتی نهدن کسدی پای؟
هارداسیز؟ دیللنمیر نهدن قوشاچای؟!
دالغالار! اوجالین، سیز سالین هارای
سولقون اوزلی گوگان باشین ساغ اولسون
ساوهده نارلارین گؤز یاشی قالماز
قان آغلار ائشیدسه بو یاسی آراز
سهندیم اویان گل بو نیسگیلیده یاز
آرالی اوخباتان باشین ساغ اولسون
اورهکلرده هله سارا یاراسی
یئتیم قالدی گؤلون داغی، آداسی
سورگونه دوشوبدو قوشو، دورناسی
قان اورهک خان چوبان باشین ساغ اولسون
دومانلار ساریلین اوجا داغلارا
گونشین باشینا سیز اورتون قارا
قاراباغ یاسیندا بودا بیر یارا
آنام آذربایجان باشین ساغ اولسون